|
geceadi@gmail.com |
|
Səid Muğanlı / yazılar - اوووی قارداشیم، شهید قارداشیم، اوووی... |
|
+ Yazılar: اوووی قارداشیم، شهید قارداشیم، اوووی... سعید موغانلینین، شهید امانی اوچون دوستاقدان یوللادیغی یازی تئرور شلپهسی ایله بلهمیشلر سنی ایندی و بیز اؤلهنه كیمی توركوز دئیه، سنی دئیه آغلاییریق و منیم گؤزلریم دوستاقدا آزادلیغا آغلاییر، سنه آغلاییر. هانی سنله چیین- چیینه یاشادیغیم او ماس ماوی تورك گونلریمیز؟ یامان آییردیلار بیزی قارداش.... من دوستاقدایام و سن تئرور شلپهسینه بلهنهرك آنا تورپاق قوجاغینا قویولورسان بو گون... قیناغیمیزدا سیچانا بنزرلری بوغدوغوموز گونلر هانی قارتال قارداشیم؟ اوچدون قارتال غرورو ایله، من اوچدوم، داغلار اوچدو. ایندی راحات اول قارداش. داها وطن اوغروندا چیرپینان او مظلوم اورهك سوسدو. گؤودهسی سنگره دؤنن امانی قارداشیم سوسدو. آما یوخ... سن داها آرتیق دیریلیرسن دوشونجهلریمیزده... بیز وطن مجنونو ائل عاشیقی، صولح عسگرییك بیز وطن نامینه اؤلسهك دیریلردن دیرییك
بئش ایل چكدیین دوستاغین بیر فایزینی چكهرَك دردلرینی دوشونورم. سن بو نسیله اومود وئردین. دردلرینی كؤكسونده باسدیریب، اؤیودلرینی بئینیمیزه تاپیشیردین. نئجه قان آغلاماییم بو درد دَن ایندی؟ نئجه یانماییم آخی؟ یالنیز اؤزونه یاراشار باش ساغلیغی. سنه اؤز اؤلومونو باش ساغلیغی وئریرم قارداش. راحات یات عؤمور بویو جان- جان دئدیین آنا تورپاغین قوجاغیندا. پارتلاییرام آما یولونو ایتیرمهیهجهیم. هئی بَیلر، آغالار بو امانی دیر. عشقینیز قدَر دوستاق چكدی و عشقینیز قدَر اؤلدو، شهید اولدو، شهید اولوندو. شهید امانینین دیریلیینی دوشونمهیهنلر باری اؤلومونو دوشونهلر كئشگه.
جانی اؤلكهم دیلهمیش وئرمهمك اولماز آی دیل نه نزاع ائیلهیهلیم اول نه سنین دیر نه منیم ائدهمز ترك امانی سركویون دوستون وطنیم دیر، وطنیم دیر، وطنیم دیر، وطنیم. |