|
geceadi@gmail.com |
|
Səid Muğanlı / Yazılar- Danışan sözcüklər |
|
+ Yazılar:
دانیشان سؤزجوکلر اوستاد بهزاد بهزادی-نی دوشونرکن سعید موغانلی
عزیزینم وطن یاخشی گئیمهیه کفن یاخشی گزمهیه غریب اؤلکه اؤلمهیه وطن یاخشی...
…یاخشی کی وطنه قیسقاندین باغرینی قوجاقلاماغی، یاخشی کی بیر ده ملهتدین آستارا لیمانینی، فریدون ابراهیمی دردلییینین عظمتینی اونوتمامیشکن... یاخشی کی سؤزجوکلرله گوللـهلندین یوخسا مرمی یاراسینا نئجه دؤزردی تبریزین قلبی سینیق آنالیغی... یاخشی کی دردی درد ائتمهدین «امامیه» نوستالوژیسینده مللیّت دردی چکن دموکرات فداییلرینه... قبرینین باشینا ییغیلماغا ماهنا گزیردیک، ایندی قبرین دئیه هارانی گؤستریم بارماقلاریم اوتانماسین! گولوستان باغیندا دیک گؤمولن چینارسانمی؟ فخری قبریستانیندا هئیکله دونموش باش ناظیریمیزسنمی؟ ایستانبولدا نوطقدن دوشن نطقیمیزسنمی؟ نئجه تاپشیراق سنی «آبراهام لینکون و مالکومایکس»ین اَیری بؤرکلو بالالارینا؟ بیزه نییه اسیرگهدین قبرینده آتا وای دئییب، «یاشاسین آذربایجان» باغیرماغی... ایندی سنی آختارماغا کابوی فیلملرینده تئلویزیونلاری سئیر ائتمهلیییک... سنین کی سؤزلوکلرینده قویلانماغا کیتاب بویدا یئرین وارایدی بو مملکتده هانسی دؤولتله سنی آستارایا کؤچورتمهلیییک؟ هانسی دؤولتله ستارخانی تبریزه کؤچورتدوک کی؟!. باری بیر اووج فریدون ابراهیمییه آزادلیق گؤندر یورغون دموکرات. آخی فریدونو کیم گولوستانین چینارلیغیندان تورپاغا تاپشیراجاق؟ باری بیر آز پیشهوری نفسی وئریدین بیزه... باری بیر آز بیریا ایمانی... باری قوی اؤلمهمهیینه ایناناق سؤزلوکلرینده یاشام سؤزجویونو آرایارکن... کیم دئییر کی سن یوخسان، بولود دالیندا گیزلَنهرک، کلمه-کلمه دیلیمده قاش-گؤز آتان گونش شعاریسان... یازیلدیقجا سن یازیلیرسان، دوداقلاندیقجا سن هیجالانیرسان، بالتایلا گؤز-گؤزه ماریدان، گوللـهیله گوللـهلشن، تیکانلی مفتیللردهجه گوللـهشن "آذربایجان دیلینین ایضاحلی لوغتی"... تکی ایندی سؤیلهسنه آنا دیلینده هانسی قزئتده سنه باش ساغلیغی یازیم، هانسی یاساق درگیده، هانسی هفتهلیکده سنین اؤلوم سفرینی یازیم صفحه دیزاینی دیسکینمهسین...! اؤزگه دیلده سنی یازماغا ایذن وئرمهدی فارسین دموکراسی! اوخونوشو، آنا دیلیمده قزئتلری باغلادیلار اؤلومونه یاس توتولماسین دئیه... چارهمیز یوخدور دئیهسن، اولسون اؤل سؤزلوک حضرتلری تکی گؤر بیزیم ده دیلی یارادان آللاه وارمی؟ وارسا مباریزهنی یئنیدن باشلا بویور حضرت فضولی سؤزجوک بَی قورقود بابا آقای آشیق علسگر بویور اؤل قارتالین اؤلومو عادتلَشمیش اولایدیر سوراهی قلمهلره، تکی قارتالین یوواسی گوللـهلنمهسین... |
