geceadi@gmail.com
|
geceadi@gmail.com |
|
|
|
اوووی قارداشیم، شهید قارداشیم، اوووی... سعید موغانلینین، شهید امانی اوچون دوستاقدان یوللادیغی یازی تئرور شلپهسی ایله بلهمیشلر سنی ایندی و بیز اؤلهنه كیمی توركوز دئیه، سنی دئیه آغلاییریق و منیم گؤزلریم دوستاقدا آزادلیغا آغلاییر، سنه آغلاییر. هانی سنله چیین- چیینه یاشادیغیم او ماس ماوی تورك گونلریمیز؟ یامان آییردیلار بیزی قارداش.... من دوستاقدایام و سن تئرور شلپهسینه بلهنهرك آنا تورپاق قوجاغینا قویولورسان بو گون... قیناغیمیزدا سیچانا بنزرلری بوغدوغوموز گونلر هانی قارتال قارداشیم؟ اوچدون قارتال غرورو ایله، من اوچدوم، داغلار اوچدو. ایندی راحات اول قارداش. داها وطن اوغروندا چیرپینان او مظلوم اورهك سوسدو. گؤودهسی سنگره دؤنن امانی قارداشیم سوسدو. آما یوخ... سن داها آرتیق دیریلیرسن دوشونجهلریمیزده...
دانیشان سؤزجوکلر اوستاد بهزاد بهزادی-نی دوشونرکن سعید موغانلی …یاخشی کی وطنه قیسقاندین باغرینی قوجاقلاماغی، یاخشی کی بیر ده ملهتدین آستارا لیمانینی، فریدون ابراهیمی دردلییینین عظمتینی اونوتمامیشکن... یاخشی کی سؤزجوکلرله گوللـهلندین یوخسا مرمی یاراسینا نئجه دؤزردی تبریزین قلبی سینیق آنالیغی... یاخشی کی دردی درد ائتمهدین «امامیه» نوستالوژیسینده مللیّت دردی چکن دموکرات فداییلرینه... قبرینین باشینا ییغیلماغا ماهنا گزیردیک، ایندی قبرین دئیه هارانی گؤستریم بارماقلاریم اوتانماسین!
سنسیز یالقیز قالیب تبریز بیزه گلنده/ اؤزون گل/ اؤزونو گتیرمه/ ایچیندهکی قیزی شهوت کوچهلرینده آزیت/ داغ گؤیرچینلرینین ایزلری ایله گل/ ظولم اودورکی، سن مشرف اولان یوخومدان هؤولهسک اویادالار منی./ گلنده دیکدابان باشماغینی گئییمه/ چاریق جورابلا گل/ سنسیزگل/ کوچه باشینداکی الی باتوملو پولیسلره باخما/ خیابان لوتولارینا شوخلوق ائلهمه/ قارا بیرگؤزلوک تاخارسان/ گؤزلرینی گؤرمهسین هئچکیم/ سنین گؤزلریندن یوزور مأمورلار، منیم یئرآلتی یوخولاریمی/ تکجه گؤزلرینی منه ساخلا/ بیزه گلنده،/ اؤزونو ده گتیرمه/ ساچلارینلا، گؤزلرین منی گؤرهر/...
اؤز «اِوین»ده اوتوروب، بیزی زیندانلارا قیشقیران گلین باجیم، «لئیلی حیدری»نین گؤیسل دویغولارینا... لئیلیملئی... لئیلیملئی... لئیلیملئی... آه ائی... لئیلی... لئیلی... لئیلی... سنین آدینلا تانینیر اوزئییر حاجیبَیلی... آدینلا اؤیونور شعر. آدینلا سئویشیر فضولی بابام. آدین نظامیلرین چیبان گؤینرتیسیدیر، آدین نیظامینین آپاق سئوگیسی. آدین واحیدلرین چاخیر مزهسی:
|
