geceadi@gmail.com

 Ramin Cəhangirzadə / Yazılar- «سؤز آتان»دان «آياق يالين»ا جيزما قارالار

+ Yazılar:

«سؤز آتان»دان «آياق يالين»ا جيزما قارالار

سئويملي سيرتيق دوستوم آياق يالين! هارالاردا سومسونورسن؟ نييه منه باش وورمورسان؟! بلكه داغلار كيمي سنينده باشينا داش دوشوبدور يئرييه بيلميرسن؟ قوتور قارغالارين گتيردييي لو خبره گؤره ائشيتميشم عاشيق ماشيق اولوبسان! مشه مجنونون اداسيني چيخارديرسان. دئمه­لي اوره­يين يئريكله­ييبدير! بير آز يئركؤكو يئسن ياخشي اولار. چونكو گؤزلرينين قووه­سي آرتار و مئرته قالميش دونياني ياخشي گؤررسن.

آي داشي باشلي ايندي سئومك زاماني دير؟! هامي سؤيه ـ سؤيه قاباغا گئدير. سنسه قابيرغالارينداكي تاپپيلتيلارا قولاق آسيرسان. بير آز اؤزونه قاييت. اؤزونو قايتار اؤزونه. او مئرته قالميش اوره­ييني بوشلا، گل قوشول منه يئنه دونياني قاتاق. قايماغيني يئيك، قاتيغيني دا چيرپاق اونون چيركين صوفاتينا. كئچميشيني يادا سال داها بسدير  تيكانلي يوللارا آياق باسيرسان. اؤزونه توکان آچيب، اؤزونو اؤزونده آساركن، آسلانيرسان. سنه هئچ اينانمازديم كي بير قيزجيغازين الينده قارغ اولاسان. سنكي هاميني قارغ ائله­ميشدين. قارغييا مينيب آت چاپديغين زامانلاري نه تئز اونوتدون. بير اوتقون اؤزنه گل بو گول پوچ اوينونودا بوشلا. حيات اونسوزدا پوچدور. پيچيلتي­لار دولما كيمي قولاغينا دولسا دا ائشيت او مئرته قالميش قولاغينلا منيم سسيي.

پاه آتوننان سنين! سنده سكوتا گئدرميشسن؟ قينيندان چيخ! هامي چيخيشيني گؤزله­يير. بير بارداق چاخير ايچ بوشلا بوشلوقلاردا اوچان گؤيرچينيني. گؤيرمه باغرين چاتلامسين. آتيل دونيانين آتينين بئلينه چاپ اونو ايسته­دييين يئره. ساري سني سارييانلاري. ساريغيندان چيخ  سيريل قاسيرغالارا. اوره­يينده نه وار سيلكه­له قوي تؤكولسون تيكانلي يوللارا. داها بسدير! ييغيشدير بو عشق توكانيني. ايندي عشقين بازاري كاساتدير.  بيليرديم سندن آل وئرچي چيخماز. ائله حياتيندا عؤمور بويو چيلخا قالاجاقسان. نئهره کيمي اويان ـ بويانا چالخالانيب، چولغالانما. چولونو گؤتور قاچ.

 آغليني باشينا ييغ! يوخ دئيه­سن لاپ آغليني ايتيريبسن. سنه گرك بير آغيل دوعاسي يازديرام بلكه آغلين باشينا گلدي. مني ده بئزديريبسن. اؤزونو بوزه ـ بوزه ائله آپاريرسان كي آپاراتچي لار دا داي سني سارييير. ائشيتميشم سورغولار ايچينده بوغورموشدار سني. آمما يوخ!  سن قورباغا كيمي گؤزل اوزوجوسن. هئچ كيم سني بوغا بيلمز. بوغسالاردا ايت كيمي يئددي جانين وار سنين. مني جين آتينا مينديرمه!  بو مكتوبو اوخوياندان سونرا منه باش وور. بلكه يئنه او گونلره قاييديب، قيني ـ قيني دئيرك نيندي قيندي وئرديك قارني يئكه دونيايا.   

ايمضاء: سؤز آتان

^{-------------------------------------------------------------------------------------------------------------------------------}

اتك يازي:

# بورادا اولان جيزماقارادا رامين جهانگيرزاده بيرينجي طنز چهره­سيله ايكينجي طنز چهره­سينه مكتوب يازير او بو آدلارلا يارپاق قزئتينده جيزما قارا ايشلرينه باخاردي.  گؤزو گؤتورمه­ينلرين نمنه­مه­نه­سي گؤينه­سين!