چپر
قوجا ائيواندا اولان كسيلميش كؤتويون اوستونده اوتوردو. چنهسيني چلييينه سؤيكهيركن، اؤزونو گونه وئردي. گؤزلريني حيهطه ساري زيللهدي حيهطين اورتاسيندا تويوق ـ جوجهلر سس كوي ساليب قايناشيرديلار. قارا كؤپك، توت آغاجينين ديبينده ياتاركن هردن بيردن گؤزلريني آچيب، يوموردو. حيهطين سول كونجونده آرابايا باغلانميش آغ مايدان آت كيشنهيركن، ديرناقلاريلا يئري ائشيردي. هوندور توت آغاجين كؤلگهسي قونشونون حيهطينه ساري اوزاناييردي. گونشين رنگي قيزاريب، ساراليردي. هاوانين رنگي دؤنوب، ياواش ـ ياواش بوزارماغا باشلاييردي.
ائوين گليني قاپ ـ باجاني سوپوروردو. كؤلگهسي قاباغينا دوشموشدو. قاباغيني سوپوره ـ سوپوره قونشو ايله اؤز آرالارينداكي چپره يئتيشدي. گلين باشيني بير آن قالديريب، گؤزآلتي قوجايا باخدي. سونرا داليني چپره سؤيكهيركن،سوپورمهيينه داوام ائتدي. او قدر سوپوردو كي يئرين تورپاغي دا چيخدي. بير روبا ياخين ايدي كي، گلين داليني چپره سؤيكهيركن، قاباغيني سوپوروردو.
قوجا گلينين ايشينه مات قالميشدي. اؤز ـ اؤزونه ـ بو قيزين باشينا هاوا گليبديرـ دئييردي. گلين داها قوجايا گؤز آلتي باخميردي، هردن گؤزلريني يوموب آچيردي. سسيني اودوب يئنه ده، قاباغيني سوپوروردو !
قارا كؤپك، توت آغاجينين ديبيندن دوردو، قويروغونو بوللايا ـ بوللايا ائوين آرخاسينا كئچدي. چپردن آچديغي جيغير يولدان، باشيني ساليب چپرين او تايينا كئچدي. زيل قارا گؤزلريني، اؤزونو چپره داياميش كيشييه زيللهدي