|
geceadi@gmail.com |
|
Məhəmməd Sübhdil / Köçürmə / ايمتاحان/كافكا |
|
ايمتاحان-كافكا چئويرن:جاويد جعفرزاده كؤچورن:محمد صبحدل
من قوللوقچويام، آما منيم اوچون ايش تاپيلمير. چکينگنام، اؤزومو ايرهلي وئرميرم، هئچ باشقالاري ايله بير سيرايا دا سوخولمورام، آما بو منيم ايشسيزليييمين يالنيز بير سببيدير، اولسون کي، عومومييتله، بونون منيم ايشسيزليييمه آزاجيق دا اولسا دخلي يوخدور، بوتون حاللاردا اساس مسله اودور کي، مني قوللوغا چاغيرميرلار، قوللوقدا دورماغي مندن آز ايستهمهلرينه و عومومييتله، قوللوغا چاغريلماغا هوس گؤسترمهمهلرينه باخماياراق، باشقالاريني چاغيريرلار، منده ايسه بو هوس بعضن چوخ گوجلو اولور. بودور من تاختدا اوزانيب تاوانين ديرهيينه باخيرام، يوخولاييرام، اويانيرام و تزهدن يوخولاييرام. هردن قارشيداکي تورش پيوه[1] وئريلن يئمکخانايا گئديرم، هردن نيفرتيمدن پيوهني ستکاندان يئره تؤکور، سونرا يئنه ايچيرم. باغلي پنجرهسيندن هئچ کسين گؤزونه ساتاشمادان بيناميزين پنجرهلرينه باخا بيلديييم اوچون همين يئمکخانادا اوتورماغي خوشلاييرام. بيزيم بينادان چوخ آز شئي گؤرونور، چوخ گومان کي، بورا، کوچهيه آنجاق دهليزلرين-آللاه درگاهينا آپارمايان دهليزلرين-پنجرهلري آچيلير. بلکه سهو ائديرم، آما بير دفه باشقا بير آدام دا-باخماياراق کي، من اوندان هئچ نه خبر آلماميشديم-بونو دئميشدي، دئمهلي، بيناميزين بو طرفيندن گؤرونوشو حاقدا اوست-اوسته دوشن تصووراتلار گومانيمي تصديقلهيير. بيناميزين پنجرهلري نادير حاللاردا آچيلير. بئله بير شئي باش وئريرسه دئمهلي، بونو پنجرهدن آشاغي بويلانماق ايستهين قوللوقچولار ائدير. بو دهليزلرده اونلاري ياخالايا بيلمزلر... يئري گلميشکن دئييم کي، من همين قوللوقچولاري تانيميرام، اونلار يوخاريدا هميشه مشغولدولار، منيمله بير اوتاقدا دئييل، باشقا يئرده ياتيرلار. گونلرين بيرينده يئمکخانايا گلنده، اوتوروب بيناميزي موشاهيده ائتديييم يئرده آرتيق بير موشتري واردي. اونا عمللي-باشلي باخماغا جورعت ائلهمهديم و ائله قاپينين آغزيندانجا قاييديب گئتمک ايستهديم. آما او، مني چاغيردي، دئمه، نه واختسا هاراداسا گؤروب صؤحبت ائتمهديييم قوللوقچولاردان بيري ايميش. - نييه قاچيرسان؟ اهيلش، ايچ! من پولونو وئرهجم.-دئدي. اوتوردوم. او مندن نهسه بارهده سوروشور، منسه جاواب وئره بيلميرديم، هئچ سواللاري دا دوز-عمللي باشا دوشموردوم. - يقين مني دعوت ائتدييين اوچون پئشمانسان، من گئديم- دئييب يئريمدن قالخماغا باشلاديم. آما او ماسانين اوزريندن اليني اوزاديب مني اوتوردوغوم کتيله[2] سيخدي. - قال،-دئدي-بو کي آنجاق ايمتاحان ايدي. کيم کي، بو سواللارين جاوابيني بيلمير، ايمتاحاني اوغورلا وئرميش حئساب اولونور... ______________________________________________ |
