Məhəmməd Riza Ləvayi / Öykü / Sonra ürəyimi onlara verdim

 + Öykülər:

سونرا اوره‌ییمی اونلارا وئردیم

اوگونو هئچ زامان اونوتمایاجاغام. بیر آخشام اوستو. بیر یابانجی دهشتین ایچینده دؤیونن اوره‌ك، سونرا بیر قارا آرابانین وییلتیسی. بو صحنه‌نی دفعه‌لر ذهنیمده سالیب چیخمیشدیم. بیر گون منی ده یاخالایاجاقمیشلار. آرابایا آتیلماغیمی، گؤزلریمین باغلانماسینی، اهانتلر ائتدیكلرینی دئمیرم آرتیق. آز سونرا بیر داریسقال اوتاق بوجاغیندا صندله باغلاندیم. بیر قورو سس باشیما دوشدو.

- سن بئش یوز دوققوزونجو پاخماسان كی دیلین دینج اوتورمور.

دوغروسو، بیربیریمیزین دیلیمیزی قانمیریق.

- آما من خالق دیلی ایله دانیشیرام.

- سوس ... بیر داها دانیشمایاجاقسان ابلیس!

بو آندا قاپی آچیلدی. حیس ائتدیم ایكی نفر منه یاخینلاشیب، بیریسی مؤحكم باشیمدان یاپیشاراق انگیمی آشاغی باسدی. دیلیمه آمپول ایگنه–سینین تاخیلماسینی دویدم. سونرا دیلیمی قارماقلا توتوب، كسدیلر. آغزیما داوا ته‌پیب بوراخدیلار. زامانین اؤتمه‌سی، یارامین ساغالماسی. اللریمله دانیشماغا گؤستردیگیم هوس، بیر قورو اتاق، بیر قورو نفس...، سونرا بیر گئجه قاپینین تله‌سیك آچلماسی... بو هامان قورو سسین صاحیبی ایدی:

- قولاق آس گؤر نه دئییرم، سنی بوراخیرام یالنیز بیر شرط ایله، اودا بوكی دیلینه صاحیب دوراسان!

من باشیملا، اللریمله اونا آنلاتدیم‌كی، آخی دیلیمی الیمدن آلیب‌سینیز، آرتیق نه ایسته­ییرسینیز؟ آما سن دئمه بوناغیلین سونو هله‌ده بیر افسانه­ایمیش. دئمه دیلیمی كسندن سونرا آپاریپ آشغال قابینا آتماق ایسته­ییرلر. دیلیمی كسنلرین بیریسی او بیریسینه دئییر: «باخ گؤر نئجه اوزون دیل­ایمیش!» او بیریسی جاواب قایتاریر: «آخی طرف هم شاعیردی همده یازار، ائله دوغروسودا بو گونلر دیلی چوخ اوزانمیشدی؛ گؤرمورسن مه‌یر؟» او حالدا دیلیم بیرینجی ­سینین الیندن پیرلاییب سالوندا كانگورو كیمی آتیلیب دوشور. سونرا باش آلیب خیاوانا دوغرو یوللانیر گئت ها گئتده اونلارا دوغرو باغیریر:

- یاخشی منی او كافتارین الیندن قورتاردینیز! هله‌لیك خوش چاغ قالینیز بئی­لر. باى بای...!

«چوخ ایجلاسلاریمیز سنین دیلینین حاققیندادیر. بیر امنیتی معظله ‌چئوریلیب­دیر بو دیل. پرئزدئنت جناب-لارینین چیخیشینی، بیرمضحكه­یه چئویریبدیر... ایندیسه سن اؤزون بو دیله صاحیب دورمالیسان.»

سونرا منی بوراخدیلار. بئصاحاب دیلیمی تاپمالی ایدیم. اولماسی بیر جور عذاب‌دیر اولماماسی باشقا جور. آخی بیر دئیه‌ن یوخدور نه­یه دیلیمی مندن آییردیلار كی ایندی بو گونه قالمیشلار؟

زامان، پاییزین رنگینه قاتیلیب رحمسیز كئچن چاغدا بیر پاركا واردیم. بیر شاعیر قادین قورو آغاج كؤتوكو اوستونده فیكیره دالیب، هوپموشدو. جل الخالق... دیلیمی اونون اته‌ییینده یوخویا گئتمیش گؤردوم! او قادین منیم شاییردلاریمدان ایدی.

- اوستاد سالام.!

بارماقلاریما جاوابلادیم. شاعیره داوام ائتدی:

- دوشونورم... هله­لیك دیلینیزه بیر یئر تاپانمامیشام. بعضا منه پناه گتیریر نه ائدیم؟ اونو آتانمارام. دیلینیزی كسنلر قوشون-قوشون اونو آراییرلار. بو سون گونلر اونو موزئی‌ده ساخلاماسینین اعلانیه‌سینی دووارلارا یاپیشدیرمیشلار. آما دیلینیز كؤنول وئرمیر.

- شاعیره­یه آنلاتدیم كی، او منیم دیلیمدیر، یئریده آغزیمدادیر. منه قاییتمالیدیر. سونرا اونا یاخینلاشیب ایسته‌دیم اته­یینده یوخلامیش دیلیمی آستاجا گؤتوروب آغزیما تپیم، آما دئمك اونون اته‌یینده آرینماز، سیلینمز بیر بؤیوك لكه واریمیش. دیلیم بالیق كیمی سیچراییب الیمدن زویویرك، اللریم قادینین اته‌یینه یاپیشیب ائله‌جه قالدی. باخیشلاریما اوندان سئوال ائتدیم:

- قیز بو لكه‌نی، كیم اته‌یینه یاخمیش؟!

- بیلمیرم كی... بعضن خیال ایله گرچگی قاتیشدیراندا بو كیمی عجایب ایشلره راست گلیرم... ایندی ایسه بو نه بلا؟

نه قد‌ر چیرپینیب-چالیندیم، یوخ كی یوخ اللریم اونون اته‌ییندن قوپمادیلار. هله، دیلیمده بیزدن آیریلاركن دئدی:

- چوخ رومانتیك بیر صحنه‌دیر به‌ی افندیم، بای بای... هله لیك!

«آللاه بو دیل باشیما نه اویونلار گتیره‌جكدیر؟» اؤز-اؤزومه دئیه­ره­ك ، پاركین نگهبانی اوزاقدان باغیردی:

- آهای حایاسیزلار، نه‌لر اولور اورادا؟!

گؤزومو شاعیره‌یه‌ تیكیب آنلاتدیم:

- ال مندن، اتك سندن، ایندی بیر چارا قیل منه.

- نه چاراسی قیلیم؟ ائله دوزو سنین دیلین اول بیر گوندن باشیمیزا هر جوره اویون گتیریب‌دیر. بودا یئنی بیر اویون.

آز زامان چكمدی هامی ییغیشدی باشیمیزا:

- اكسیك، سنین الین بونون اته‌یینده نه قاییریر؟

- بوجور آداملاری آسماق گرك!

- واه-واه گون آشكار... خالقین گؤز قاباغیندا... آللاه گؤسترمه‌سین!

پولیس­لره كیمسه خبر وئرمیشدی. كلانترینین رئیسی منه دوغرو چیغیردی:

- بو اللر كؤكوندن كسیلمه‌لیدیر.

شاعیره اوزونو اونا دوغرو توتوب. اوتاناراق دئدی:

- او یانلیز دیلینی ایسته‌ییردی. منله ایشی یوخ ایدی سرهنگ.

-   دیلینی؟ یانی اونون دیلی سیزین اته‌یینیزدن باشلانیب‌دیر؟

بیریسی ازدحام ایچیندن باغیردی:

یا گرك بو اللر كسیله یادا...

- یادا نه؟

- یادا گرك او اتك چیخا!

- كس دیلینی غئیرت­سیز.

- ناموس سوز.

آرتیق نه یازیم؟ یئنه بیر آمپول... سونرا هوشدان گئتمك و سونرا آییلیب اؤزونو زنداندا بیر تاخت اوسته گؤرمك. آه اللریم، اللریم. بس نئجه یازاجاغام؟ نه دانیشماغا دیلیم، نه یازماغا الیم... اللریم كسیلمیشدی. اللریم، گوجلو سیرداشلاریم. سن دئمه اللریمین حئكایه­سی دیلیمین حئكایه‌سیندن ده ائشیتمله­لی ایمیش. اللریمی كسندن سونرا اونلاری بیر ایته آتیرلار كی یئسین. همن پاركدا هامینین  گؤزونون قاباغیندا، اللریم ایته دوغرو یوگوروب. خیر خیراسیندان یاپیشیب، اونو بوغماق ایسته‌ییرلر. الیمین بیریسی قلم گؤتوروب هر یئرده دیلیمین حاققیندا، اونا گئدن ظولملر اساسیندا، نه‌دن كسیلدیگی حاقدا مقاله‌لر، كیتابلار و اعلانیه‌لر یازیب، دیلین صاحیبینه قاییتماسینی ایسته‌ییر. او بیری الیم ایسه توفنگ گوتوروب. داغ داشا دوشوب، های-كوی سالیب بیر دهشتلی فضالارین یارانماسینا باعث اولموشدور. میللت ایكی­یه بولونموشدو. ساغ الیمین طرفلرینه ساغچی، سول الیمین طرفلرینه سولچو دئییرلر. بیر گون اونلارین ایكی­سینین بحثینه شاهیدایدیم. زیندانین حَیَطینده آخشام چاغی منی بیر بوجاغا چكیب دئدیلر:

- سن حؤكوم ائت بودیل نئجه قاییتمالی‌دیر.

- سونرا منی بوراخیب بیربیرلریله غریب دانیشیقلار آپاردیلار.

- قلم یالنیز بیر قورو چؤپ‌دور. من بئله دوشونورم‌كی، اساسدا بیزیم اختلافیمیز یوخدور، یانلیز سالقالارادا فرقلی­ییك. من توفگه اینانیرام.

- زورو بوتون دونیا رد ائدیر. هئچ اولمازسا بیر اورتاق نظره چاتا بیله­ریك، ائله دئییل ؟

- من اونو بونو قانمیرام، بوسن بودا دیلین صاحیبی، گؤر اؤزو نه دئییر؟

-   ائله باشیمیزا هر اویون گتیرن سنین قانمازلیغین‌دی...

- یانی من قانمازام؟!...

هاچان؟ نه واخت؟ بیلمه‌دیم. اونلار دوتوشدولار. من آرادا نه ائتمه­لی‌ ایدیم؟

هارادانسا بیر بامباچا اوتوردو كلله‌‌مه. ائله بیر بامباچاكی گؤزلریم شوشه ماوزی كیمی آتیلیب دوشدو یئره. آه گؤزلریم... گؤزلریم. حیاتیمین سونونجو ایشیق یوللاری. بودا اونلارین داواسینین خئیری منه. بیزی بیر سویوق داخمایا آتدیلار. اؤزگه‌لر دیلیمی، الیمی كسدیلر. اؤزومونكولرده گؤزلریمی چیخارتدیلار. هئچ دئیه‌ن یوخكی سن نه اومودلا یاشاییرسان اینسان اوغلو؟ بو فیكیرلرده ایدیم كی اونلارین سسی ایله اؤزومه گلدیم.

- نه یامان سویوقدور بو داخما.

- نه ده قارانلیق.

- نه ائتمه‌لی ایندی؟!

چارام یوخ ایدی. سونونجو یولودا گئتمه‌لی ایدیم... من اوره‌ییمی قوپاریب اونلارا وئردیم آز سونرا اونلارین سؤزوندن دویدم كی داخما ایشیقلانیب‌دیر. اورانین قیزیشماسینی اؤزوم ده حیس ائتدیم، هله اونلارین پیچیلتی سینی دا ائشیتدیم:

- دئیه سن بو اور‌ك ‌ده، یاغی قورتارمیش فانیس كیمی الیمیزه ایش وئره‌جكدیر... گؤرورسن نئجه پیرت- پیرت ائدیر؟!

- هله توستوله­مه­یینی نییه دئمیرسن؟!