geceadi@gmail.com

 İsmayıl Cəmili / Şeirlər- Biz varıq

+ Şeirlər:

Biz Varıq...

Ayırdılar yol yarıya çatmadan

Ayrımçılar yolumuzdan bizləri

Bir düz yolun düzlüyünə varmadan

Əyri yolun bitirdilər özləri

Biz güvəndik düz inama düz yola

Bir baxmadıq tələ quran sağ, sola

Çatdırmadan yolu başa qol-qola

Bizə düşmən gostərdilər bizləri

Alçaqları şişitdilər dağ oldu       

Məzarları bəzədilər bağ oldu

Biz qara gün, kömür üzü ağ oldu

Yenə bizi görənmədi gözləri

Düşünmədən yol kimindir atlandıq

Bizə qənim olanlarla yollandıq

Yarı yolda yoldaşlara talandıq

Axtaranda dönümlərdə düzləri

Bir gün başa çatacaqdır ayrılıq

Yubansa da gələcəkdir azadlıq

Bölünsək də talansaqda biz varıq

Kül altında saxlamışıq közləri

بیز واریق

آیردیلار    یول    یاریيا   چاتمادان

آیریمچیلار   یولوموزدان    بیزلری

بیر دوز یولون دوزلوگونه وارمادان

اَیری    یولون    بیتیردیلر   اؤزلری

بیز  گووندیک دوز ایناما  دوز یولا

بیر باخمادیق تله قوران  ساغ  سولا

چاتدیرمادان  یولو   باشا  قول  قولا

بیزه   دشمن   گؤرستدیلر   بیزلری

آلچاقلاری    شیشیتدیلر   داغ   اولدو

مزارلاری    بزه­دیلر     باغ    اولدو

بیز قارا گون ، کؤمور اوزو آغ اولدو

یئنه    بیزی    گؤرنمه دی   گؤزلری

دوشونمه­دن یول کیمیندیر آتلاندیق

بیزه   غنیم   اولانلارلا   یوللاندیق

یاری  یولدا    یولداشلارا   تالاندیق

آختاراندا    دؤنوملرده      دوزلری

بیر گون باشا   چاتاجاقدیر  آیریلیق

یوبانسادا      گله­جکدیر     آزادلیق

بؤلونسَكده ، تالانساقدا    بیز واریق

کول آلتیندا   ساخلامیشیق  کؤزلری